Demokracia në Veprim | Zgjedhjet 2007

(17 nëntor)

Komunikatë për Media

8 dhjetor, 2007

Ora 21:00

Komunikatë për media nr. 3 për rrjedhën e votimit në raundin e dytë të zgjedhjeve për kryetarë të komunave

Gjakovë

Në qendrën e votimit shkolla fillore ‘Zekeria Rexha’ (0205c), vendvotimi 8 ka pasur mjaft raste të votimit familjar. Janë raportuar së paku 4 raste kur personave u është lejuar që të votojnë për persona që nuk kanë qenë të pranishëm. Në ato raste, anëtarët e komisionit të zgjedhjeve në atë vendvotim u kanë dhënë fletëvotime votuesve duke u mundësuar atyre që të nënshkruhen pranë emrave të personave të tjerë.

Njëri nga zyrtarët e Komisionit, përgjegjës për vulosjen e fletëvotimeve, i ka sugjeruar pothuajse secilit votues që ‘të mos harrojnë të shënojnë 89’. Në të njëjtin vendvotim ka raste të shumta që anëtarët e komisionit të zgjedhjeve ndërhyjnë gjatë votimit, gjoja për t’u ndihmuar votuesve.

Pjesëtari i Komisionit të zgjedhjeve, përgjegjës për vulosjen e fletëvotimeve, pas përfundimit të votimit ka filluar të plotësojë vetë fletëvotimet e mbetura. Pasi këtë gjë e ka vërejtur përfaqësuesi i AAK-së, në vend se të ndalë plotësimin e fletëvotimeve ata janë marrë vesh për t’i plotësuar së bashku fletëvotimet për të dy subjektet e tyre politike.

Prishtinë

Në Fakultet Filologjik, jashtë qendrës së votimit, vërehet prani e madhe e njësiteve speciale të policisë.

Në shkollën “Hasan Prishtina”, një votuese ka tentuar të votojë dy herë. Kur e njëjta është penguar për ta bërë këtë ajo ka tentuar që të bëjë presion për ta mbyllur vendvotimin.

Në oborrin e shkollës ‘Esat Mekuli’ në Dobratin, Podujevë, kryetari i komisionit komunal të zgjedhjeve (Islam Demolli) është goditur me shuplakë nga një person i paidentifikuar.

Të gjitha qendrat e votimeve në Prishtinë janë mbyllur në kohë, përkundër disa tensioneve në qendra të ndryshme, si ajo në shkollën ‘Faik Konica’, në shkollën ‘Hasan Prishtina’ etj.

Raportet e gjertanishme tregojnë për rrjedhë normale në rajonet e tjera, me përjashtim të shkeljeve të cilat janë raportuar në komunikatat e mëhershme.